बुधवार, 12 अगस्त 2015

क आगतः


                      सुरुचिश्यामलगात्रो
                      मातः क आगतः।

कंञ्जलोचनः कुंञ्चितकेशः
उन्नतभालो वल्कलवेशः ।
                कस्मिन्देशे जातः
                मातः क आगतः।।

स्कन्धे धनुः सशरतूणीरः
उदग्रोपि स वयस्यो धीरः।
              यथा स्थिरः संवातः
              मातः क आगतः।।

पर्णकुटी रचिताति सुरुचिरा
तत्रैका सुन्दरी च मधुरा
            यथा निशान्ते प्रातः
            मातः क आगतः।।

अमरावतीवदेव सुन्दरी
ख्याता जगत्ययोध्या नगरी
             तत्रायं भोः जातः
             मातः क आगतः।।
दाशरथिः रघुवंशनन्दनः
स च कौसल्यानन्दवर्द्धनः
            लोकत्रयविख्यातः
            मातः क आगतः।।

अयमपरश्च लक्ष्मणो वीरः
योगरतो धृतवल्कलचीरः
           अनुजोऽस्यैव ख्याातः
           मातः क आगतः।।

स्वामिसङ्गता परमपुनीता
रघुकुलवधूः रामपरिणीता
                                   जयति जानकी माता
                                   जाने क आगतः।।

सुन्दरी शरत्समागता


एहि एहि स्वागतं विधेहि सौभगं प्रदेहि
                सुन्दरी शरत्समागता।।

मन्दमन्दपावनप्रसूनगन्धसंकुलः
स्पर्शसौख्यदायकः प्रवाति शीतलोऽनिलः।

निर्वृतिप्रदायिनी समस्ततापहारिणी
                श्रेयसी शरत्समागता।।1।।

नष्टसर्वदूषणा विधौतपङ्कनिर्मला
स्वच्छवारिवाहिनी पयस्विनी स्फुरज्जला
हृत्प्रसादिनी विनष्टसर्वचित्तकल्मषा
                पावनी शरत्समागता।। 2।।

संयमेन शान्तकच्छकोद्वहत्सरोघटा
कृच्छ्रमेव बिभ्रती स्खलत्सरिच्छिरःपटा

ग्रामबालिकेव सम्भ्रमेण सृतिविहारिणी
                 षोडशी शरत्समागता।।3।।

स्वर्णशालिभूषणा प्रवृद्धकासभासुरा
मन्थरैः पदक्रमैश्च हंसनादनूपुरा

लज्जया प्रसह्य भूरुहैर्हि गुण्ठितानना
             मुग्धिका शरत्समागता।।4।।

चन्द्रिकाम्बरा निरभ्रशुभ्रकेशकुन्तला
शीर्षके हि चन्द्रबिन्दुमण्डितेव सत्कला

चन्दनाङ्किताङ्वीतगरागसाधिकानिभा
              तापसी शरत्समागता।।5।।
                                    लेखिका- डाॅ0 नवलता

मंगलवार, 11 अगस्त 2015

गर्जति नभसि पयोदः


                 कजलीगीतम्

गर्जति नभसि पयोदः
प्रियः परदेशं गतो मे।।

        श्यामघटा सर्वत्र राजते
        तमसाच्छन्नं दिनं भासते।
        मनसि भवति मे भीतिः
        प्रियः परदेशं गतो मे।।

हरहरायते भीषणवातः।
प्रबलञ्झया क्रियते घातः।
अहमेका वै गेहे
प्रियः परदेशं गतो मे।।

       तडिदेषा नु दहति मे हृदयम्
       जलधारेव वहति मे नयनम्।
       अत्युष्णो निःश्वासः
       प्रियः परदेशं गतो मे।।

रिक्ता शय्या दोला रिक्ता।
अनुरक्तापि भवामि विरक्ता।
कोऽपि हरतु सन्देशं
प्रियः परदेशं गतो मे।। 
                        लेखिका- डा0 नवलता

नव्या गीतिः


नव्या गीतिः नव्यारीतिः
नव्यः स्वप्नो नव प्रतीतिः
नवसन्देशो नवनिर्माणम्
न स्याद्भीतिः न च संशीतिः।

         कल्पयेम समवेत्य साम्प्रतं
         नव्यं भारतम्।।

सर्वे विद्याज्ञानसमृद्धा
विज्ञानेऽपि सदा संसिद्धा।
भूयो यान्तु गुरुत्वं लोके
तेजोधर्मवयोभी वृद्धाः।

       श्रेष्ठादर्शतया नूनं
       गन्तव्यं भारतम्।।

पतितपावनी गङ्गाधारा
वातु सदैव जीवनाधरा।
कालियविषदूषिता पाव्यतां
रवितनया भूयादविकारा।

         साधयेम देवैरप्युषितं
         दिव्यं भारतम्।।

भ्रष्टाचारः पापाचारः
यत्र भवतु नो मिथ्याचारः।
रक्ष्यतां नारीसम्मानः
मनसो नश्यतां कुविचारः।

         भावयेम सर्वथा धरायां
         भव्यं भारतम्।।

नव्यविचारो नव्यो वेशः
धर्मकर्मगीतासन्देशः
भावात्मकमैक्यं प्रवर्तयन्
सुरभारतीसमृद्धो देशः।

       सञ्चरेम वाङ्मनोकर्मभिः
      स्वीयं भारतम्।।
                        लेखिका- डाॅ0 नवलता

वाणी वन्दना


                              वीणावादिनि! वीणां वादय।।

षड्जादिकसप्तस्वरसाध्यं नादमनाहतमद्य निनादय।।

जीवनगतिं रुणद्धि सर्वतोऽप्यन्धतमिस्रामयपरिवेशः।
सम्प्रसार्य चन्द्रिके निजाभां सम्प्रति जन-गण-मन आह्लादय।।

त्रिविधतापसन्तप्तो लोको विषमज्वालावृतो दह्यते।
करुणामयि निजकृपादृष्टिदं स्नेहवितानमचिरमाच्छादय।।

आच्छादय नूतने विहायसि नवसङ्कल्पघटाः रसपूराः।
वर्षं वर्षं मधुमय्यमृतं कलुषकलङ्कमखिलमुत्सादय।।

बहुशोऽप्युत्थानस्य प्रलापो विवर्धते ह्यपशब्दाभ्यासः।
परिष्कृत्य तच्छब्दचेतनामर्थविवेकमतिं सम्पादय।।

प्रकृतिमङ्कारोऽभिभवत्यथ सत्त्वं रजो तमोऽभिनिविष्टमम्।
महदुद्भाव्य सर्जनाभूमावध्यवसायधियं प्रतिपादय।।
                                                                             लेखिका- डाॅ0 नवलता